অভি-নীল হত্যাকাণ্ডত ২০ দোষীক আজীৱন কাৰাদণ্ড
মৃতকৰ পৰিয়াল অসন্তুষ্ট, মৃত্যুদণ্ডৰ দাবী পুনৰ উত্থাপন
গুৱাহাটীৰ প্ৰতিবেদক, ২৪ এপ্ৰিলঃ ২০১৮ চনৰ চাঞ্চল্যকৰ অভি-নীল লিঞ্চিং কাণ্ডত ২০ জন দোষীক ভাৰতীয় দণ্ডবিধিৰ ৩০২ নং ধাৰাৰ অধীনত আজীৱন কাৰাদণ্ডৰ লগতে প্ৰতিজনক ২০ হাজাৰ টকাৰ জৰিমনা বিহা হৈছে। নগাঁও আদালতে এই ৰায় ঘোষণা কৰে। এই তথ্য নিশ্চিত কৰি জ্যেষ্ঠ আইনজীৱী বিজন মহাজনে কয় যে আদালতে সকলো ২০ জন দোষীক আজীৱন কাৰাদণ্ড প্ৰদান কৰিছে।
অৱশ্যে এই ৰায়ত মৃতকৰ পৰিয়ালসমূহে অসন্তুষ্টি প্ৰকাশ কৰিছে। নিহত নিলোৎপল দাসৰ পিতৃয়ে কয় যে তেওঁলোকে মৃত্যুদণ্ড আশা কৰিছিল, কিন্তু আদালতৰ এই ৰায়ত তেওঁলোক সম্পূৰ্ণ সন্তুষ্ট নহয়। তেওঁলোকে আগন্তুক দিনত এই বিষয়ত উচ্চ ন্যায়ালয়ত আবেদন কৰাৰ সম্ভাৱনাও উল্লেখ কৰে।
উল্লেখ্য যে, ২০ এপ্ৰিলত আদালতে এই ঘটনাত জড়িত ৪৫ জন অভিযুক্তৰ ভিতৰত ২০ জনক দোষী সাব্যস্ত কৰাৰ লগতে ২৫ জনক মুক্তি দিয়ে।
এই ঘটনাটো ২০১৮ চনৰ ৮ জুনত কাৰ্বি আংলং জিলাৰ ডকমকা অঞ্চলৰ পাঞ্জুৰি গাঁৱত সংঘটিত হৈছিল, য’ত Abhijit Nath আৰু Nilotpal Das-ক এটা দলে আক্ৰমণ কৰি হত্যা কৰিছিল। এই ঘটনাই সমগ্ৰ দেশজুৰি তীব্ৰ প্ৰতিক্ৰিয়া সৃষ্টি কৰিছিল।
প্ৰায় আঠ বছৰ পিছত ঘোষণা হোৱা এই ৰায়ে পুনৰ এই সংবেদনশীল ঘটনাটোক জনচৰ্চাৰ কেন্দ্ৰবিন্দু কৰি তুলিছে।
Post a Comment