অসমৰ মহাবিদ্যালয়সমূহত NEP ৰূপায়ণত জটিলতা, অনিশ্চয়তাত হাজাৰ হাজাৰ ছাত্ৰ-ছাত্ৰী

অসমৰ মহাবিদ্যালয়সমূহত NEP ৰূপায়ণত জটিলতা, অনিশ্চয়তাত হাজাৰ হাজাৰ ছাত্ৰ-ছাত্ৰী

আজিৰ কণ্ঠ  ,গুৱাহাটী, ১০ জুনঃ অসমৰ হাজাৰ হাজাৰ ছাত্ৰ-ছাত্ৰীৰ উচ্চ শিক্ষাৰ ভৱিষ্যৎ অনিশ্চয়তাৰ সন্মুখীন হৈছে, কিয়নো নতুন শিক্ষা নীতি (NEP) অনুসৰি চাৰি বছৰীয়া স্নাতক পাঠ্যক্ৰম ৰূপায়ণৰ ক্ষেত্ৰত ৰাজ্যৰ বহু মহাবিদ্যালয়ে বিভিন্ন সমস্যাৰ সন্মুখীন হৈছে। ২০২৩ চনত অসমত NEP প্ৰৱৰ্তন কৰা হৈছিল। এই নীতি অনুসৰি স্নাতক পাঠ্যক্ৰম চাৰি বছৰীয়া হ'ব লাগে, য'ত ‘অ’নাৰ্ছ’ আৰু ‘অ’নাৰ্ছ উইথ ৰিচাৰ্চ’ ডিগ্ৰীৰ ব্যৱস্থা আছে। কিন্তু বিগত তিনিবছৰত চৰকাৰে মহাবিদ্যালয়সমূহৰ আন্তঃগাঁথনি উন্নয়ন, নতুন শিক্ষক নিযুক্তি আৰু প্ৰয়োজনীয় সুবিধা বৃদ্ধিৰ ক্ষেত্ৰত যথেষ্ট পদক্ষেপ গ্ৰহণ নকৰাৰ অভিযোগ উত্থাপিত হৈছে।

জুলাই মাহত চতুৰ্থ বৰ্ষৰ নামভৰ্তি আৰম্ভ হোৱাৰ কথা আৰু আগষ্ট মাহৰ পৰা পাঠদান চলিব। কিন্তু এতিয়াও Gauhati University-এ চতুৰ্থ বৰ্ষৰ পাঠ্যক্ৰম (Syllabus) প্ৰকাশ কৰা নাই। ফলত ইয়াৰ অন্তৰ্গত মহাবিদ্যালয়সমূহে পাঠদানৰ প্ৰস্তুতি আৰম্ভ কৰিব পৰা নাই। আনহাতে Dibrugarh University-এ ইতিমধ্যে পাঠ্যক্ৰম প্ৰস্তুত কৰি প্ৰকাশ কৰিছে, যাৰ ফলত ইয়াৰ অন্তৰ্গত মহাবিদ্যালয়সমূহে কিছু পৰিমাণে আগবাঢ়ি প্ৰস্তুতি চলাব পাৰিছে।

শিক্ষক সংকটও এক গুৰুত্বপূৰ্ণ সমস্যা হিচাপে দেখা দিছে। অধিকাংশ মহাবিদ্যালয়ত বৰ্তমানেও বহু শিক্ষক পদ খালী হৈ আছে। চাৰি বছৰীয়া পাঠ্যক্ৰম পৰিচালনাৰ বাবে অতিৰিক্ত শিক্ষক প্ৰয়োজন হ'লেও চৰকাৰে নতুন পদ অনুমোদন কৰা নাই।

ইয়াৰ উপৰিও গৱেষণামূলক পাঠ্যক্ৰম সফলভাৱে চলাবলৈ নতুন শ্ৰেণীকোঠা, আধুনিক পৰীক্ষাগাৰ, ডিজিটেল লাইব্ৰেৰী আদি সুবিধাৰ প্ৰয়োজন। কিন্তু এই ক্ষেত্ৰসমূহতো উল্লেখযোগ্য উন্নয়ন নোহোৱাত NEP-ৰ সফল ৰূপায়ণক লৈ উদ্বেগ বৃদ্ধি পাইছে।
উল্লেখযোগ্য যে, NEP কাৰ্যকৰী কৰাৰ সময়তে All Assam Students' Union (AASU)-এ শিক্ষানুষ্ঠানসমূহৰ আন্তঃগাঁথনি উন্নয়ন নকৰাকৈ নতুন শিক্ষা নীতি ৰূপায়ণ নকৰিবলৈ চৰকাৰক আহ্বান জনাইছিল। এতিয়া চতুৰ্থ বৰ্ষ আৰম্ভ হোৱাৰ পূৰ্বমুহূৰ্তত সেই আশংকাসমূহ বাস্তৱ ৰূপ ল'বলৈ আৰম্ভ কৰিছে বুলি শিক্ষা মহলত আলোচনা চলিছে।